ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓄᑦ ᐊᐅᓚᑦᑎᓂᕐᒧᑦ ᐋᖅᑭᐅᒪᔪᖓᑦ ᐊᔪᙱᑎᑦᑎᔪᖅ ᐊᐅᓚᓪᓗᒍ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᑦ ᐃᓅᑉ ᒥᒃᓵᓅᖓᔪᑦ ᑐᑭᓯᐅᒪᔾᔪᑎᓂᒃ ᑲᑎᖅᓱᐃᖃᑦᑕᖓᑦ, ᐊᑐᖅᖢᒋᑦ, ᐅᖃᐅᓯᕆᑉᓗᒋ ᐊᒻᒪᓗ ᐱᓯᒪᑉᓗᒋᑦ ᐱᓕᕆᐊᖃᖅᖢᑎᒃ ᒪᓕᒐᓕᕆᓂᒃᑯᑦ ᐊᑐᖅᑕᐅᖃᑦᑕᖅᑐᓂᑦ. ᐋᖅᑭᐅᒪᔪᖅ ᕿᒥᕐᕈᔭᐅᖃᑦᑕᖅᑐᖅ ᒪᕐᕉᒃ ᐅᑭᐅᑕᒫᒃᑯᑦ.
ᐃᓱᒪᑕᐅᓂᕐᓂᒃ ᐃᑲᔪᖅᑕᐅᓂᖅ
ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᑦ ᐊᖏᕈᑎᖃᖅᓯᒪᔪᖅ ᐋᖅᑭᐅᒪᔪᒥᒃ ᐊᒻᒪᓗ ᐊᑐᖅᑕᐅᑎᓐᓂᐊᖅᖢᒍ.
ᐊᖓᔪᖅᑳᖅ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᔨ
ᐊᖓᔪᖅᑳᖅ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᔨ ᑕᒪᐃᓐᓅᖓᔪᒃᑯᑦ ᐱᔪᖕᓇᖅᑎᑦᑎᔨᐅᔪᖅ ᖃᐅᔨᓴᐃᓂᕐᒧᑦ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᖅ ᐊᐅᓚᑕᐅᓂᖓᓄᑦ ᐊᒻᒪᓗ ᒪᓕᒃᑕᐅᓂᖓ ᐃᓚᐅᑉᓗᑎᒃ ᐅᑯᐊ ᐱᔭᒃᓴᐅᑕᐅᓗᐊᖅᑐᑦ:
- ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᐊᐅᓚᑦᑎᓂᓕᐅᕆᓂᖅ ᐱᔾᔪᑎᖃᖅᑐᓂᒃ ᑲᑎᖅᓱᐃᓂᕐᒧᑦ, ᐊᑐᕐᓗᒋᑦ ᐊᒻᒪᓗ ᐅᖃᐅᓯᕆᓗᒋᑦ ᐃᓄᖕᒧᑦ ᑐᑭᓯᐅᒪᔾᔪᑏᑦ ᐊᒻᒪᓗ ᖃᐅᔨᓴᐃᓐᓇᖃᑦᑕᕐᓗᒋᑦ.
- ᖃᐅᔨᓴᕐᓗᒋᑦ ᓇᐅᒃᑯᓗᒃᑖᖅ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᑦ ᐊᒻᒪᓗ ᒪᓕᒃᑕᐅᑎᑦᑎᓂᖅ, ᐃᓚᐅᑉᓗᑎᒃ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒥᒃ ᐊᐅᓚᑦᑎᓂᕐᒧᑦ ᐸᕐᓇᐅᑎ.
- ᐊᐅᓚᓪᓗᒋᑦ ᐊᒻᒪᓗ ᑭᐅᔾᔪᑎᒋᓗᒋᑦ ᑕᒪᐃᓐᓂᒃ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓂᒃ ᓯᖁᒥᑦᑎᓃᑦ ᐊᒻᒪᓗ/ᐅᕝᕙᓘᓐᓃᑦ ᑐᑭᓯᐅᒪᔾᔪᑎᓂᒃ ᐱᔾᔪᑎᓕᖕᓄᑦ ᖃᓄᐃᓕᓃᑦ.
- ᑭᐅᔾᔪᑎᖃᕐᓗᓂ ᐊᒻᒪᓗ ᐊᐅᓚᓪᓗᒋᑦ ᑕᒪᕐᒥᓗᒃᑖᑦ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᐅᓐᓂᕐᓘᑕᐅᔪᑦ.
- ᐱᓕᕆᖃᑎᒋᓗᒋᑦ ᑎᑎᕋᕐᕕᖓ ᑐᑭᓯᐅᒪᔾᔪᑎᓄᑦ ᐊᒻᒪᓗ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᑲᒥᓯᓇ ᐃᓚᐅᑉᓗᑎᒃ ᐱᔾᔪᑎᖃᖅᑐᓂᒃ ᖃᐅᔨᓴᐃᓂᕐᓄᑦ.
- ᓴᖅᑭᑦᑎᓗᓂ, ᑲᒪᒋᓗᒍ ᐊᒻᒪᓗ ᑐᑭᒧᐊᒃᑎᕐᓗᒋᑦ ᐱᓕᕆᐊᖑᓂᖓ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᐊᔪᕈᖕᓃᖅᓴᖅᑕᐅᓂᖏᑦ ᐱᓕᕆᔩᑦ.
- ᐊᔪᙱᓐᓂᖃᖅᑐᑎᑐᑦ ᑲᒪᔨᐅᓗᓂ ᖃᐅᔨᒋᐊᕐᕕᐅᑦᑕᕐᓂᕐᒧᑦ ᐊᒻᒪᓗ ᐊᑕᐅᓯᖅ ᐱᓕᕆᔨᒧᑦ ᐊᐱᖅᑯᑎᖃᖅᐸᑕ ᐅᕝᕙᓘᓐᓃᑦ ᐃᓱᒫᓘᑎᖃᖅᐸᑕ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᐅᑉ ᒥᒃᓵᓄᑦ.
- ᐃᑲᔪᕐᓗᒋᑦ ᐱᓕᕆᔩᑦ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒨᖓᔪᓂᒃ ᐱᔨᑦᑎᕋᐅᑎᒥᒃ-ᑐᓂᓯᖃᑦᑕᖅᑐᑦ-ᐊᐅᓚᑦᑎᔩᑦ ᐱᔾᔪᑎᓕᖕᓂᑦ.
- ᕿᒥᕐᕈᓗᒋᑦ ᐊᒻᒪᓗ ᐅᑉᓗᒥᒨᓕᖅᑐᕐᓗᒋᑦ ᐃᓄᖕᒧᑦ ᑐᑭᓯᐅᒪᔾᔪᑏᑦ ᐱᔭᐅᓯᒪᔪᑦ ᐊᒻᒪᓗ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐋᖅᑭᐅᒪᔪᖅ ᐊᒻᒪᓗ ᐃᒪᓐᓈᖅᑐᐃᓗᓂ ᖃᓄᐃᓕᐅᕆᐊᖃᕈᑕᐅᔪᓂᒃ ᐅᕝᕙᓘᓐᓃᑦ ᐋᖅᑭᒋᐊᕆᐊᖃᖅᑐᓄᑦ.
ᐊᒧᕈᖕᓃᖅᓴᐃᓂᖅ
ᑎᑎᕋᕐᕕᖕᒥᑦ ᐱᓕᕆᔨᓗᒃᑖᑦ (ᐱᓕᕇᓐᓇᐅᔭᖅᑐᑦ ᐊᒻᒪᓗ ᐱᓕᕆᓚᐅᐱᓪᓚᒃᑐᑦ) ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᐊᔪᕈᖕᓃᖅᓴᖅᑕᐅᖃᑦᑕᖅᑐᑦ ᐃᓚᒋᔭᐅᑉᓗᓂ ᖃᐅᔨᒪᓕᖅᑎᑉᐹᓪᓕᖅᑎᑕᐅᓂᖏᓐᓄᑦ. ᐊᔪᕈᖕᓃᖅᓴᐃᓂᖅ ᐱᓕᕆᓚᐅᐱᓪᓚᒃᑐᓄᑦ ᓂᕈᐊᖅᑐᓕᕆᓂᕐᒥᑦ ᐱᓕᕆᔨᓄᑦ ᓂᕈᐊᕆᐊᖅᑐᕐᕕᖕᓂᑦ ᐃᓚᐅᔪᑦ ᖃᓄᐃᓕᐅᖁᔭᐅᓂᖏᑦ ᓈᒻᒪᒃᑐᒃᑯᑦ ᐊᑐᕐᓂᐊᕐᓗᒋᑦ ᐊᒻᒪᓗ ᐊᐅᓚᓐᓂᐊᕐᓗᒋᑦ ᐃᓄᖕᒨᖓᔪᑦ ᑐᑭᓯᐅᒪᔾᔪᑏᑦ.
ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒥᒃ ᐊᐅᓚᑦᑎᓂᕐᒧᑦ ᐊᑐᐊᒐᐃᑦ
ᐋᖅᑭᐅᒪᔪᑦ ᐊᒻᒪᓗ ᐊᑐᓕᖅᑎᑕᐅᓯᒪᔪᑦ ᐃᑲᔪᐃᓂᐊᕐᓗᓂ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᒪᓕᒋᐊᖃᕐᓂᐅᔪᑦ ᐊᒻᒪᓗ ᐊᐅᓚᑦᑎᓂᐅᔪᑦ. ᐊᑐᐊᒐᐃᑦ ᐊᒻᒪᓗ ᑕᒪᑐᒧᙵᓕᕆᓃᑦ ᐊᒻᒪᓗ ᑎᑎᕋᐃᓃᑦ ᖃᑯᑎᒃᑯᑦ ᕿᒥᕐᕈᔭᐅᖃᑦᑕᖅᑐᑦ ᐊᒻᒪᓗ ᐅᑉᓗᒥᒨᓕᖅᑐᖅᑕᐅᑉᓗᑎᒃ ᐱᔭᕆᐊᖃᕐᓂᖅ ᒪᓕᒃᖢᒍ ᒫᓐᓇᒨᓕᖓᑎᓐᓂᐊᖅᖢᒋᑦ ᐊᒻᒪᓗ ᐃᓗᐃᑦᑑᖓᓗᑎᒃ.
ᑎᑎᕋᖅᓯᒪᔪᑦ ᐱᔾᔪᑎᖃᖅᑐᑦ ᐊᑐᐊᒐᓄᑦ ᐱᔭᐅᔪᖕᓇᖅᑐᑦ ᐅᕙᓂ:
- ᓂᕈᐊᒐᒃᓴᖅ ᐊᑐᕐᓂᖓ ᓂᕈᐊᕈᖕᓇᖅᑐᑦ ᐊᑎᖏᓐᓂᑦ-ᕼᐋᒻᓚᒃᑯᑦ ᓂᕈᐊᖅᑎᑦᑎᓃᑦ (PDF)
- ᓂᕈᐊᒐᒃᓴᖅ ᐊᑐᕐᓂᖓ ᓂᕈᐊᕈᖕᓇᖅᑐᑦ ᐊᑎᖏᓐᓂᑦ-ᒪᓕᒐᓕᐅᖅᑎᓄᑦ ᓂᕈᐊᖅᑎᑦᑎᓃᑦ (PDF)
- ᑐᒃᓯᕋᐃᓗᓂ ᐱᔪᒪᓗᓂ ᑐᑭᓯᐅᒪᔾᔪᑎᓂᒃ ᐃᓄᓗᒃᑖᓄᑦ ᑎᑎᖅᑲᐅᑎᐅᖏᑦᑐᓂᒃ (PDF)
ᖃᐅᔨᒃᑲᐅᑏᑦ
ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᑐᓴᖅᑎᑦᑎᓂᐊᖅᑐᑦ ᐃᓄᖕᒥᒃ ᐱᕝᕕᒋᖃᑦᑕᖅᑕᑉᑎᖕᓂᑦ ᐃᓄᖕᒧᑦ ᑐᑭᓯᐅᒪᔾᔪᑎᖏᓐᓂᒃ, ᑲᑎᖅᓱᐃᑎᓪᓗᒋᑦ ᐱᔾᔪᑎᒋᑉᓗᒍ ᐱᔾᔪᑕᐅᔪᖅ ᑲᑎᖅᓱᐃᓂᕐᒧᑦ, ᐱᔪᖕᓇᖅᑎᑦᑎᓂᖅ ᑲᑎᖅᓱᖅᑕᐅᓂᖏᓐᓄᑦ, ᐊᒻᒪᓗ ᖃᓄᖅ ᖃᐅᔨᒋᐊᕐᕕᐅᔪᖕᓇᕐᓂᖓ ᐊᖓᔪᖅᑳᖅ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ.
ᐃᓄᖕᒧᑦ ᑐᑭᓯᐅᒪᔾᔪᑏᑦ ᐱᔭᐅᓯᒪᔪᑦ
ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᐱᓕᕆᐊᕆᖃᑦᑕᖅᑕᖏᑦ ᐊᒻᒪᓗ ᐅᑉᓗᒥᒨᓕᖅᑐᖅᖢᒋᑦ ᐱᔭᐅᓯᒪᔪᑦ ᐃᓄᖕᒧᑦ ᑐᑭᓯᐅᒪᔾᔪᑏᑦ ᓇᓗᓇᐃᖅᓯᓯᒪᔪᓂᒃ ᐅᑯᓂᙵᑦ:
- ᖃᓄᐃᑦᑑᓂᖏᑦ ᐃᓄᖕᒧᑦ ᑐᑭᓯᐅᒪᔾᔪᑏᑦ ᑲᑎᑕᐅᔪᑦ, ᐊᑐᖅᑕᐅᔪᑦ ᐊᒻᒪᓗ ᐊᖏᕈᑕᐅᔪᑦ.
- ᐱᔾᔪᑎᒋᔭᐅᔪᑦ ᐃᓄᖕᒧᑦ ᑐᑭᓯᐅᒪᔾᔪᑏᑦ ᑲᑎᑕᐅᓂᖏᓐᓄᑦ, ᐊᑐᖅᑕᐅᓂᖏᓐᓄᑦ ᐊᒻᒪᓗ ᐊᖏᕈᑕᐅᓂᖏᓐᓄᑦ.
- ᖃᓄᐃᓕᐅᕐᓂᐅᔪᑦ ᐊᑐᓂ ᑲᑎᖅᓱᐃᓂᕐᓄᑦ, ᐊᑐᖅᑕᐅᓂᖏᓐᓄᑦ ᐅᕝᕙᓘᓐᓃᑦ ᐊᖏᕈᑕᐅᓂᖏᓐᓄᑦ.
- ᐊᑐᖅᑕᐅᔪᖅ ᑲᑎᖅᓱᐃᓂᕐᒧᑦ, ᐊᑐᖅᑕᐅᓂᖏᓐᓄᑦ ᐅᕝᕙᓘᓐᓃᑦ ᐊᖏᕈᑕᐅᓂᖏᓐᓄᑦ ᐃᓄᖕᒧᑦ ᑐᑭᓯᐅᒪᔾᔪᑏᑦ.
- ᐃᓂᒋᔭᐅᔪᖅ ᐃᓄᖕᒧᑦ ᑐᑭᓯᐅᒪᔾᔪᑏᑦ ᐱᔭᐅᓯᒪᔪᓄᑦ.
- ᐸᐸᑕᐅᓂᖏᑦ ᐊᒻᒪᓗ ᓱᕋᒃᑎᖅᑕᐅᓂᖏᑦ ᖃᖓᒃᑯᑦ ᐊᑐᓂ ᐃᓄᖕᒧᑦ ᑐᑭᓯᐅᒪᔾᔪᑏᑦ.
ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒥᒃ ᓯᖁᒥᑦᑎᓂᕐᓄᑦ ᒪᓕᒐᖅ
ᐊᔾᔨᒌᙱᑦᑑᓂᖏᓐᓄᑦ ᑐᑭᓯᐅᒪᔾᔪᑎᓄᑦ ᖃᓄᐃᓕᓂᐅᔪᑦ ᐅᕝᕙᓘᓐᓃᑦ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒥᒃ ᓯᖁᒥᑦᑎᓂᐅᔪᑦ, ᐱᑕᖃᙱᑦᑐᖅ “ᐊᑕᐅᓯᖅ ᓈᒻᒪᒃᑐᖅ ᑕᒪᐃᓐᓄᑦ” ᑭᐅᔾᔪᑎᒥᒃ, ᐊᒻᒪᓗ ᖃᓄᐃᓕᐅᕐᓂᐅᔪᑦ ᐃᓚᖏᑦᑎᒎᖅᑐᑦ ᐊᒻᒪᓗ ᓈᒻᒪᒃᖢᑎᒃ ᐊᑐᓂ ᖃᓄᐃᓕᓂᐅᔪᓄᑦ. ᑕᐃᒪᓐᓇᐃᑦᑐᖃᒻᒪᕆᒃᓯᒪᒃᐸᑦ ᐅᕝᕙᓘᓐᓃᑦ ᐸᓴᒋᔭᐅᔪᒥᒃ ᑐᑭᓯᐅᒪᔾᔪᑏᑦ ᒥᒃᓵᓄᑦ ᖃᓄᐃᓕᔪᖃᕐᓂᖓᓄᑦ ᐅᕝᕙᓘᓐᓃᑦ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒥᒃ ᓯᖁᒥᑦᑎᔪᒥᒃ:
- ᐱᓕᕆᔩᑦ ᐊᒻᒪᓗ/ᐅᕝᕙᓘᓐᓃᑦ ᐱᔨᑦᑎᕋᐃᔨᐅᔪᑦ ᐅᖃᐅᓯᕆᓗᒍ ᖃᓄᐃᓕᓂᖅ ᐅᕝᕙᓘᓐᓃᑦ ᐸᓴᒋᔭᐅᔪᖅ ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᓐᓄᑦ;
- ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᑦ ᖃᐅᔨᓂᐊᖅᑐᖅ ᑭᖑᓂᐊᒍᑦ ᖃᓄᐃᓕᐅᕆᐊᖃᕐᓂᐅᔪᓂᒃ ᐃᓚᐅᑉᓗᓂ ᐃᓚᐅᑎᑦᑕᕆᐊᖃᕐᒪᖔᑦ ᑎᑎᕋᕐᕕᖓ ᑐᑭᓯᐅᒪᔾᔪᑎᓄᑦ ᐊᒻᒪᓗ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᕐᒧᑦ ᑲᒥᓯᓇ, ᐳᑭᖅᑕᓖᑦ ᐊᓯᖏᓪᓘᓐᓃᑦ ᑕᒪᒃᑯᐊ ᒥᒃᓵᓄᑦ ᐱᔪᖕᓇᖅᑎᑦᑎᔩᑦ.
ᖃᐅᔨᒪᔭᐅᓕ: ᐃᒃᐱᖕᓇᖅᑐᓖᑦ ᑐᑭᓯᐅᒪᔾᔪᑏᑦ ᐊᒻᒪᓗ ᐃᓄᖕᒨᖓᔪᑦ ᑐᑭᓯᐅᒪᔾᔪᑏᑦ ᐃᓱᒪᒋᔭᐅᔪᑦ ᐊᕕᒃᓯᒪᓂᖏᓐᓄᑦ, ᐃᒃᐱᖕᓇᖅᑐᑦ ᑐᑭᓯᐅᒪᔾᔪᑏᑦ ᑎᑭᐅᑎᖕᒪᑕ ᐅᖓᑖᓄᑦ ᐃᓄᖕᒨᖓᔪᑦ ᑐᑭᓯᐅᒪᔾᔪᑎᓂᒃ ᐃᓄᖕᒨᖓᙱᑦᑐᓄᑦ ᑭᓯᐊᓂ ᖃᐅᔨᒪᔭᐅᔭᕆᐊᖃᙱᑦᑐᓄᑦ ᑐᑭᓯᐅᒪᔾᔪᑎᓄᑦ.
ᖃᐅᔨᒋᐊᕐᕕᒋᓗᒋᑦ
ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓕᕆᓂᐅᑉ ᒥᒃᓵᓄᑦ ᐊᐱᖅᑯᑎᓄᑦ ᐃᓱᒫᓘᑎᓄᓪᓘᓐᓃᑦ, ᖃᐅᔨᒋᐊᕐᕕᒋᓗᒍ ᐊᖓᔪᖅᑳᖅ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓗᕆᔨ ᐅᕗᖓ:
41 Sivulliq Avenue
ᑲᖏᖅᖠᓂᖅ, NU X0C 0G0
T: 645-4610 (ᑲᖏᖅᖠᓂᖅ) ᐅᕝᕙᓘᓐᓃᑦ 1-800-267-4394 (ᐊᑭᖃᙱᑦᑐᖅ ᑲᓇᑕᒥᑦ)
