ᓂᕈᐊᒐᒃᓴᖅ ᐃᓅᔪᖅ ᓂᕈᐊᒐᒃᓴᐅᓇᓱᒃᑐᖅ ᓂᕈᐊᖅᑎᑦᑎᓂᕐᒥᑦ. ᓄᓇᕗᒻᒥ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᕐᓂᑦ ᐅᕝᕙᓘᓐᓃᑦ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᕐᓂᑦ, ᓂᕈᐊᒐᒃᓴᖅ ᓂᕈᐊᖅᑕᐅᕐᓗᐊᓛᖑᔪᖅ ᑭᒡᒐᖅᑐᖅᑕᐅᕝᕕᖕᒥᑦ (ᓂᕈᐊᖅᑎᑦᑎᓂᖃᕐᕕᐅᔪᖅ) ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᙳᖃᑦᑕᖅᑐᖅ ᑕᐃᑉᓱᒧᙵ ᑭᒡᒐᖅᑐᖅᑕᐅᕝᕕᖕᒧᑦ.
ᑭᓇ ᓂᕈᐊᒐᒃᓴᐅᔪᖕᓇᖅᐸ?
ᓂᕈᐊᕐᓂᖅ ᐊᔪᙱᒃᑯᕕᑦ, ᓂᕈᐊᒐᒃᓴᐅᔪᖕᓇᖅᑐᑎᑦ.
- ᑕᑯᓗᒍ ᑭᓇ ᓂᕈᐊᕈᖕᓇᖅᐸ?
ᑭᒡᒐᖅᑐᖅᑕᐅᕝᕕᖕᒧᑦ ᒪᓕᒐᐃᑦ
- ᑭᑐᓗᒃᑖᓂᒃ ᓂᕈᐊᖅᑎᑦᑎᓂᕐᒧᑦ, ᓂᕈᐊᒐᒃᓴᐅᔪᖕᓇᖅᑐᑎᑦ ᓇᓕᑐᐃᓐᓇᖏᓐᓂᑦ ᑭᒡᒐᖅᑐᖅᑕᐅᕝᕕᖕᓂᑦ ᓄᓇᕗᒻᒥᑦ, ᐊᑕᐅᓯᑐᐃᓐᓇᐅᖏᑦᑐᒧᑦ ᓄᓇᖃᕐᕕᒋᔭᕐᓂᑦ. ᑭᓯᐊᓂ ᓂᕈᐊᒐᒃᓴᐅᓂᐊᕈᕕᑦ ᓂᕈᐊᒐᒃᓴᐅᔪᖕᓇᖅᑐᑎᑦ ᐊᑕᐅᓯᑐᐃᓐᓇᕐᒥᑦ ᑭᒡᒐᖅᑐᖅᑕᐅᕝᕕᖕᒥᑦ.
- ᑕᒪᐅᓇᒥᐊᖅ ᓂᕈᐊᖅᑎᑦᑎᓂᕐᒧᑦ, ᑭᒡᒐᖅᑐᖅᑕᐅᕝᕕᖕᒥᐅᑕᐅᔭᕆᐊᖃᖅᑐᑦ ᐅᑉᓗᕐᒥᑦ ᓂᕈᐊᕐᓂᖃᖁᔨᓂᕐᒧᑦ ᑎᓕᓯᔾᔪᑎ ᓴᖅᑭᑕᐅᖕᒪᑦ.
ᐊᔪᖅᑎᑕᐅᓃᑦ ᓂᕈᐊᒐᒃᓴᐅᔪᖕᓇᕐᓂᕐᒧᑦ
ᐊᔾᔨᐅᖏᑦᑐᓂᒃ ᐊᔪᖅᑎᑕᐅᓂᖅᑕᖃᖅᑐᖅ ᓂᕈᐊᒐᒃᓴᐅᓂᕐᒧᑦ. ᓂᕈᐊᒐᒃᓴᐅᓂᖅ ᐊᔪᖅᑐᑎᑦ ᐃᒪᓐᓇᐃᒃᑯᕕᑦ:
- ᐱᓕᕆᔨᐅᒍᕕᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᓐᓄᑦ;
- ᐱᓕᕆᔨᐅᒍᕕᑦ ᓄᓇᕗᑦ ᒐᕙᒪᒃᑯᓐᓄᑦ ᐱᓕᕆᐊᖕᓂᑦ ᓄᖅᑲᙱᒃᑯᕕᑦ;
- ᐃᓚᒋᔭᐅᔪᖅ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ (ᒪᐃᔭ ᑲᑎᒪᔨᒧᓪᓘᓐᓃᑦ) ᓄᖅᑲᖓᓚᐅᙱᓪᓗᓂ ᐅᐸᙱᓐᓂᕐᒥᓂ;
- ᒪᓕᒐᓕᐅᖅᑎᐅᒍᕕᑦ ᑲᓇᑕᐅᑉ ᒪᓕᒐᓕᐅᕐᕕᖓᓄᑦ, ᓴᓇᑑᒍᕕᑦ, ᐅᕝᕙᓘᓐᓃᑦ ᒪᓕᒐᓕᐅᕐᕕᖕᒧᑦ ᐊᓯᐊᓂᑦ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᖏᓐᓂᑦ ᐅᕝᕙᓘᓐᓃᑦ ᑲᓇᑕᐅᑉ ᐊᕕᒃᑐᖅᓯᒪᔪᖏᓐᓂᑦ;
- ᐃᖅᑲᖅᑐᐃᔨᐅᒍᕕᑦ (ᑭᓯᐊᓂ ᐃᓄᓕᕆᓂᕐᒧᑦ ᐃᖅᑲᖅᑐᐃᔨᐅᒍᕕᑦ ᐊᔪᙱᑦᑐᖅ);
- ᐃᓄᒃ ᑎᒍᔭᐅᓯᒪᔪᖅ ᑎᒍᔭᐅᓯᒪᓂᐊᖅᖢᓂᓗ ᓱᓕ ᓂᕈᐊᕐᓇᐅᑉ ᐅᑉᓗᖓ ᐊᓂᒍᖅᑎᓪᓗᒍ;
- ᐃᓄᒃ ᒪᓕᓚᐅᖏᑦᑐᖅ ᒪᓕᒋᐊᖃᕐᓂᕐᒧᑦ ᐊᖏᖃᑎᒌᒍᑎᒥᒃ ᑭᖑᓪᓕᖅᐹᕐᒥᑦ ᓂᕈᐊᖅᑎᑦᑎᓂᕐᒥᒃ ᐱᔪᒥᒃ; ᐅᕝᕙᓘᓐᓃᑦ,
- ᑮᓇᐅᔭᓕᕆᔨᐅᓚᐅᖅᑐᖅ ᓂᕈᐊᒐᒃᓴᐅᓚᐅᖅᑐᕐᓘᓐᓃᑦ ᑭᖑᓪᓕᖅᐹᕐᒥᑦ ᓂᕈᐊᖅᑎᑦᑎᓂᕐᒥᑦ ᑐᓂᐅᑎᖃᙱᖦᖢᓂᓗ ᑮᓇᐅᔭᐃᑦ ᒥᒃᓵᓄᑦ ᐅᓂᑉᑳᑦ ᐅᑎᖅᑎᑦᑕᕆᐊᓕᖏᓂᒃ ᑭᖑᕙᙱᓪᓗᑎᒃ: ᑎᑎᕋᖅᓯᒪᔪᑦ ᐊᑎᖏᑦ ᒪᓕᓚᐅᖏᑦᑐᑦ ᓂᕈᐊᒐᒃᓴᐃᑦ ᐊᒻᒪᓗ ᑮᓇᐅᔭᓕᕆᔩᑦ ᐅᕙᓂ ᐱᔭᐅᔪᖕᓇᖅᑐᑦ.
ᒪᓕᒐᓕᐅᖅᑎ ᒪᓕᒐᓕᐅᕐᕕᖕᒧᑦ ᐃᓂᒥᓂᒃ ᓄᖅᑲᕈᖕᓇᖅᑐᖅ ᐸᓯᔭᒃᓴᙳᕐᒪᑦ ᐸᓯᔭᐅᖕᒪᓪᓘᓐᓃᑦ ᐱᕋᔭᖕᓂᕐᒧᑦ ᒪᓕᒃᖢᒋᑦ ᓄᓇᕗᑦ ᑲᓇᑕᐅᑉᓘᓐᓃᑦ ᒪᓕᒐᖏᑦ. ᐃᓄᒃ ᓂᕈᐊᒃᓴᙳᒃᑲᓐᓂᕈᖕᓇᖅᑐᖅ ᑭᓯᐊᓂ ᑕᓪᓕᒪᐃᑦ ᐅᑭᐅᑦ ᑭᒡᒐᖅᑐᖅᑕᐅᕝᕕᒃ ᓂᕈᐊᖅᑳᖅᑎᓪᓗᒍ ᐊᓯᐊᓂᒃ ᐃᓇᖏᖅᑎᒋᓂᐊᖅᑕᖓᓂᒃ.
ᖃᓄᖅ ᓂᕈᐊᒐᒃᓴᙳᕈᖕᓇᖅᐳᖓ?
-
ᐅᖃᓕᒫᕐᓗᒋᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᒪᓕᒐᒃᓴᐅᑎᖏᑦ:
-
ᖃᐅᔨᒋᐊᕐᕕᒋᓗᒍ ᐱᓕᕆᕝᕕᒋᔭᐃᑦ
ᐃᓚᖏᑦ ᐱᓕᕆᕝᕕᐅᔪᑦ ᒪᓕᒐᖃᖅᑐᑦ ᐱᓕᕆᔨᖏᓐᓄᑦ ᓂᕈᐊᒐᒃᓴᐅᔪᓄᑦ. ᐆᒃᑑᑎᒋᓗᒍ, ᐱᓕᕆᐊᖕᓂᑦ ᓄᖅᑲᖓᑐᐃᓐᓇᕆᐊᖃᖅᑐᑎᑦ ᓂᕈᐊᖅᑎᑦᑎᓂᐅᑎᓪᓗᒍ.
-
ᑮᓇᐅᔭᓕᕆᔨᒋᓂᐊᖅᑕᖕᓂᒃ ᓂᕈᐊᕐᓗᑎᑦ
ᑖᒻᓇ ᐃᓄᒃ ᐊᐅᓚᑦᑎᖃᑦᑕᖅᑐᖅ ᑮᓇᐅᔭᓗᒃᑖᓂᒃ ᐱᔫᒥᓵᕆᓂᕆᔭᖕᓄᑦ. ᐱᖃᑦᑕᖅᑐᑦ ᑐᓂᕐᕈᓯᐊᓂᒃ ᐃᑲᔪᖅᑐᐃᔪᓂᒃ ᐱᔭᐅᔪᓂᒃ, ᐊᑭᓕᖅᖢᒋᑦ ᐊᑐᕐᓂᑯᐃᑦ, ᐊᒻᒪᓗ ᐃᑲᔪᕐᓗᓂᑎᑦ ᑮᓇᐅᔭᐃᑦ ᒥᒃᓵᓄᑦ ᐅᓂᑉᑳᖕᓂᑦ ᓂᕈᐊᖅᑎᑦᑎᓂᖅᑕᖄᓂᒃᑳᖓᑦ. ᐃᒡᕕᑦ ᑮᓇᐅᔭᓕᕆᔩᓪᓗ ᑕᒪᑉᓯᒃ ᐊᑎᓕᐅᕆᐊᖃᖅᑕᓯ ᓂᕈᐊᒐᒃᓴᙳᕈᒪᔾᔪᑏᑦ.
-
ᓂᕈᐊᒐᒃᓴᙳᕈᒪᓂᕋᕐᓗᑎᑦ
ᑕᑕᑎᕐᓗᒍ ᓂᕈᐊᒐᒃᓴᙳᕈᒪᔾᔪᑎ. ᐊᑎᓕᐅᖅᑕᐅᔭᕆᐊᖃᖅᑐᖅ ᐃᓕᖕᓄᑦ ᐊᒻᒪᓗ ᑮᓇᐅᔭᓕᕆᔨᖕᓄᑦ. ᐊᒡᔭᕐᓗᒍ ᓄᓇᓕᖕᓂᑦ ᓂᕈᐊᖅᑐᓕᕆᔨᒋᔭᕐᓄᑦ ᓂᕈᐊᖅᑐᓕᕆᔨᐅᑉ ᐃᑲᔪᖅᑎᖓᓄᓪᓘᓐᓃᑦ.
ᑕᐃᒪᓐᓇᐃᑦᑕᕆᐊᖃᖅᑐᑎᑦ ᐊᑯᓐᓂᖏᓐᓂᑦ 35-ᓗ 31-ᓗ ᐅᑉᓗᐃᑦ ᓂᕈᐊᕐᓇᐅᑉ ᐅᑉᓗᐊᑕ ᓯᕗᓂᐊᒍᑦ. ᑭᒡᓕᖓ ᐅᑉᓗᖅ ᑐᓂᓯᔪᖕᓇᕐᓂᕐᒧᑦ ᑭᖑᓪᓕᖅᐹᖅ ᐅᑉᓗᕐᒥᑦ 2:00-ᒧᐊᖅᐸᑦ (ᓄᓇᓕᐅᑉ ᖃᐅᔨᓴᐅᑎᖓ ᒪᓕᒡᓗᒍ).
ᑐᓂᓯᔭᕆᐊᖃᖅᑐᑎᑦ $200-ᒥᒃ ᐊᑭᓕᐅᑎᒥᒃ ᑐᓂᐅᑎᒋᒍᖕᓂ ᓂᕈᐊᒐᒃᓴᙳᕈᒪᔾᔪᑏᑦ.
ᐊᓯᖏᑦ ᑕᑕᑎᒐᒃᓴᐃᑦ ᐊᒻᒪᓗ ᐱᕝᕕᐅᖃᑦᑕᖅᑐᑦ
ᑐᑭᓯᐅᒪᔾᔪᑎᒃᑲᓐᓂᕐᓂᒃ ᓂᕈᐊᖅᑎᑦᑎᓃᑦ ᐊᒻᒪᓗ ᓂᕈᐊᒐᒃᓴᐅᓂᐅᑉ ᒥᒃᓵᓄᑦ ᐱᒃᑲᓐᓂᕈᒪᒍᕕᑦ, ᐅᖃᓕᒫᕐᓗᒋᑦ:
ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᑕᑕᑎᕆᐊᓕᓗᒃᑖᖏᑦ ᐊᓯᖏᓪᓗ ᐊᒥᓱᑦ ᐱᕝᕕᐅᔪᖕᓇᖅᑐᑦ ᒪᓂᒪᔪᑦ ᐅᕙᓂ:
