ᐃᓄᓕᒫᑦ ᑐᓴᖅᑎᑕᐅᓗᑎᒃ ᑲᑎᒪᑎᑕᐅᓛᖅᑐᑦ ᐃᖃᓗᖕᓂ ᐅᑐᐱᕆ 12, 2022−ᒥ, 6:00−ᒧᐊᖅᐸᑦ ᐅᓐᓄᒃᓴᒃᑯᑦ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᖕᒥ ᓂᕈᐊᕐᓂᐅᓛᖅᑐᖅ ᐊᓐᓂᔾᔭᐅᔪᓐᓇᖅᑐᓂᒃ ᐱᐊᓂᒃ ᓂᐅᕐᕈᑎᖃᕈᓐᓇᕐᓗᑎᒃ ᐱᔪᓐᓇᐅᑎᓖᑦ ᐃᖃᓗᖕᓂ.
ᑭᒡᒐᖅᑐᐃᔨᑦ ᑮᓇᐅᔭᓕᕆᔨᒃᑯᓐᓂᙶᖅᑐᑦ ᐊᒻᒪᓗ ᓂᕈᐊᖅᑐᓕᕆᔨᒃᑯᑦ ᓄᓇᕗᒻᒥ ᑭᒃᑯᑐᐃᓐᓇᓂᒃ ᑲᑎᒪᑎᑦᑎᓛᖅᑐᑦ ᑐᑭᓯᒋᐊᖅᑎᑦᑎᓗᑎᒃ ᓂᕈᐊᖅᑎᑦᑎᓂᐅᑉ ᒥᒃᓵᓄᑦ, ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᒪᓕᒐᕐᓂᒃ ᓂᕈᐊᖅᐸᓪᓕᐊᓂᐊᖅᑐᓂᓪᓗ. ᐃᖃᓗᖕᒥᐅᑕᓕᒫᑦ ᑐᙵᓱᒃᑎᑕᐅᔪᐃᓐᓇᐅᕗᑦ ᐃᓚᐅᖁᔭᐅᓪᓗᑎᒃ. ᑕᒧᓗᒐᒃᓴᖅᑕᖃᓛᖅᑐᖅ.
ᑕᒪᓐᓇ ᑕᖅᑭᖅ ᐊᒃᐸᖅᐸᑦ, ᐃᖃᓗᖕᒥᐅᑦ ᓂᕈᐊᓛᖅᑐᑦ ᓄᓇᕗᒻᒥ ᐃᒥᐊᓕᓗᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᑲᑎᒪᔨᖏᓐᓂᒃ ᑐᓂᓯᖃᑦᑕᕐᓂᐊᕐᒪᑕ ᐱᔪᓐᓇᐅᑎᓂᒃ ᐃᖃᓗᖕᒥᐅᑦ ᐱᐊᓕᐅᖅᑎᖏᓐᓄᑦ ᓂᐅᕐᕈᑎᒃᓴᖏᓐᓂᒃ ᐱᐊᓂᒃ ᐊᓯᖏᓐᓂᒃ ᐃᒥᐊᓗᒃᑖᕐᕕᖕᓂ.
ᐊᖏᖅᑕᐅᒃᐸᑦ, ᑕᐃᒪᐃᑦᑐᑦ ᐱᔪᓐᓇᐅᑎᑦ ᐱᕕᖃᕈᑕᐅᔪᓐᓇᓛᖅᐳᑦ ᐱᐊᓕᐅᖅᑎᓄᑦ ᐃᖃᓗᖕᓂ ᓂᐅᕐᕈᑎᖃᕈᓐᓇᕐᓗᑎᒃ ᑭᒡᓕᖃᖅᑎᑕᐅᔪᓂᒃ ᐱᐊᓂᒃ ᓂᐅᕕᖅᐸᓪᓕᐊᔪᓄᑦ ᓇᑭᙶᕐᓂᖏᑦ ᒪᓕᒡᓗᒋᑦ. ᓂᐅᕐᕈᑕᐅᒋᐊᓕᑦ ᑭᒡᓕᖏᑦ ᑕᒪᒃᑯᓄᖓ ᐱᔪᓐᓇᐅᑎᓄᑦ ᐅᓄᙱᓛᖃᖅᑐᑦ ᐊᕐᕕᓂᓕᖕᓂᑦ ᖁᓚᐃᑦᑕᕆᐊᓕᖕᓂᒃ ᐅᕝᕙᓘᓐᓃᑦ ᐊᓕᒍᕐᓂᒃ ᐅᓄᓛᖃᕐᓗᒍ 12-ᖑᓗᑎᒃ 355 ml ᐃᒪᖅᑐᑎᒋᔪᑦ ᐱᐊᓂᒃ ᐃᓄᖕᒧᑦ ᐊᑕᐅᓯᕐᒧᑦ, ᐅᓪᓗᕐᒧᑦ ᐊᑕᐅᓯᕐᒧᑦ.
ᐃᒡᓗᖁᑎᖓᑕ ᓯᓚᑖᓂ ᐱᔪᓐᓇᐅᑎᖃᕈᓐᓇᖅᑎᑕᐅᕗᑦ ᐃᒥᐊᓗᓕᕆᓂᕐᒧᑦ ᐱᖁᔭᖅ ᒪᓕᒃᖢᒍ, ᑭᓯᐊᓂ, ᓄᓇᓕᖕᓂ ᓂᕈᐊᖅᑎᑦᑎᔭᕆᐊᖃᖅᐳᑦ ᓄᑖᒥᒃ ᐱᔪᓐᓇᐅᑎᒥᒃ ᓯᕗᓪᓕᖅᐹᑦᑎᐊᒥ ᑐᓂᓯᓂᐊᕈᑎᒃ ᓄᓇᓕᖕᓂ.
ᐃᖃᓗᖕᓂ ᓂᕈᐊᖅᑎᑦᑎᓛᖅᑐᑦ ᐅᑐᐱᕆ 24, 2022-ᒥ, ᓂᕈᐊᖅᐸᒌᔭᓛᖅᖢᑎᒡᓗ ᐅᑐᐱᕆ 17, 2022-ᒥ. ᐃᒥᐊᓗᓕᕆᓂᕐᒧᑦ ᐱᖁᔭᖅ ᒪᓕᒃᖢᒍ, 60 ᐳᓴᖏᑦ ᓂᕈᐊᖅᑏᑦ ᓂᕈᐊᕆᐊᖃᖅᐳᑦ "ᐊᖏᕐᓗᑎᒃ" ᐊᓯᔾᔩᖁᔨᒃᐸᑕ. ᓂᕈᐊᖅᑐᑦ "ᐋᒃᑳᖅᐸᑕ", ᓂᐅᕈᑕᐅᕙᒃᑐᑦ ᐱᔪᓐᓇᐅᑎᖏᑦ ᓱᖁᓯᔾᔮᙱᑦᑐᑦ.
ᑐᑭᓯᒋᐊᒃᑲᓐᓂᕈᒪᒍᔅᓯ ᐃᓄᓕᒫᓂᑦ ᑲᑎᒪᑎᑦᑎᓂᐅᓛᖅᑐᒥᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕈᓐᓇᖅᐳᓯ ᐅᕗᖓ liquor@gov.nu.ca ᐅᕝᕙᓘᓐᓃᑦ ᐅᕗᖓ ᐅᖄᓚᓗᑎᒃ 867-975-6816.
