ᐊᐱᖅᑯᑕᐅᒐᔪᒃᑐᑦ

ᓂᕈᐊᕈᖕᓇᖅᑐᑎᑦ ᐅᐃ-ᐅᐃ-ᑯᑦ ᐃᓕᓐᓂᐊᖅᑐᓕᕆᔨᐊᓛᒃᑯᑦ ᑲᑎᒪᔨᖏᓐᓂᑦ ᐅᐃ-ᐅᐃ-ᑐᑦ ᐅᖃᓪᓚᒃᑎᐅᓂᕐᒧᑦ ᐱᔪᖕᓇᐅᑎᖃᕈᕕᑦ, ᑎᑭᐅᑎᓯᒪᓗᑎᑦ ᐊᑕᐅᓯᕐᒥᒃ ᐃᓚᒋᔭᐅᔪᒥᑦ ᐅᖃᐅᓯᐅᔪᖅ ᑎᑎᖅᑲᖅ 23-ᒥᑦ ᑲᓇᑕᒥᑦ ᒪᓕᒐᖅ ᐱᔪᖕᓇᐅᑎᓄᑦ ᐊᒻᒪᓗ ᐃᓱᒪᖅᓱᕐᓂᕐᓄᑦ:

• ᐅᖃᐅᓰᑦ ᐅᐃ-ᐅᐃ-ᖑᖕᒪᑦ (ᐃᓕᑦᑎᖅᑲᐅᑕᐅᓚᐅᖅᑕᐃᑦ ᐊᒻᒪᓗ ᑐᑭᓯᐊᑉᓗᒍ ᓱᓕ);
• ᐃᓕᓐᓂᐊᖅᓯᒪᒐᕕᑦ ᓄᑕᖅᑲᐃᑦ ᐃᓕᓐᓂᐊᕐᕕᐊᓂᑦ ᐅᐃ-ᐅᐃ-ᑎᑐᑦ ᐃᓕᓐᓂᐊᕐᕕᖕᒥᑦ ᑲᓇᑕᒥᑦ;
• ᐊᖓᔪᖅᑳᕆᔭᐅᒐᕕᑦ (ᒥᐊᓂᖅᓯᔨ) ᓄᑕᕋᕐᒧᑦ ᐃᓕᓐᓂᐊᖅᓯᒪᔪᒥᒃ ᐃᓕᓐᓂᐊᖃᑦᑕᖅᑐᒥᒡᓘᓐᓃᑦ ᓄᑕᖅᑲᐃᑦ ᖁᑦᑎᖕᓂᖅᓴᒥᓪᓘᓐᓃᑦ ᐅᐃ-ᐅᐃ-ᑎᑐᑦ ᐃᓕᓐᓂᐊᕐᕕᖕᒥᑦ ᑲᓇᑕᒥᑦ.

ᐊᒻᒪᓗ ᐃᒪᓐᓇᐃᓐᓇᕕᑦ:

• 18 ᐅᖓᑖᓂᓪᓘᓐᓃᑦ ᐅᑯᐅᓕᒃ
• ᓄᓇᕗᒻᒥᐅᑕᐅᓕᖅᑐᖅ ᐊᑕᐅᓯᕐᒥᑦ ᐅᑭᐅᕐᒥᑦ
• ᐊᓯᐊᓂᑦ ᐃᓕᓐᓂᐊᖅᑐᓕᕆᔨᐊᓛᒃᑯᓄᑦ ᓂᕈᐊᖅᑎᑦᑎᓂᕐᓂᑦ ᓂᕈᐊᕐᓂᐊᖏᖦᖢᑎᑦ

ᒫᓐᓇᐅᔪᖅ ᐃᓕᓐᓂᐊᕐᕕᑐᐊᖅ ᐅᐃ-ᐅᐃ-ᑎᑐᑦ ᐃᖃᓗᖕᓃᑦᑐᖅ, ᑭᓯᐊᓂ ᑭᓇᑐᐃᓐᓇᖅ ᓄᓇᕗᒻᒥᑦ ᓂᕈᐊᕐᓂᖅ ᐊᔪᙱᑦᑐᖅ ᓂᕈᐊᕈᖕᓇᖅᑐᖅ ᐅᐃ-ᐅᐃ-ᓄᑦ ᐃᓕᓐᓂᐊᖅᑐᓕᕆᔨᐊᓛᒃᑯᖏᓐᓄᑦ.  ᒥᓂᔅᑕ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐃᑲᔪᕈᖕᓇᖅᑐᖅ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᓐᓂᑦ ᐊᑎᓕᐅᕆᓂᕐᒧᑦ ᓂᕈᐊᖅᑎᓂᒃ ᐅᐃ-ᐅᐃ-ᓄᑦ ᐃᓕᓐᓂᐊᖅᑐᓕᕆᔨᐊᓛᒃᑯᖏᓐᓄᑦ ᓂᕈᐊᖅᑎᑦᑎᓂᖏᓐᓂᑦ.

ᔫᓂ 2017-ᒥᑦ, ᒪᓕᒐᓂᒃ ᑐᒃᓯᕋᐅᓯᐅᓚᐅᖅᑐᑦ (ᐱᖁᔭᒃᓴᖅ 49) ᓅᑕᐅᑉᓗᓂ, ᕼᐋᒻᓚᒃᑯᓐᓄᑦ ᑲᑎᒪᔨᓄᑦ, ᒪᐃᔭᒧᑦ ᐊᒻᒪᓗ ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔨᓄᑦ ᓂᕈᐊᖅᑎᑦᑎᓂᐅᔪᑦ ᒪᓕᒐᖏᑦ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᖏᓐᓂᒃ ᐊᑐᕐᓂᐊᓕᕐᓗᑎᒃ, ᓄᓇᕗᒻᒥ ᓂᕈᐊᖅᑐᓕᕆᔨᒃᑯᓪᓗ ᐱᔭᒃᓴᖃᓕᖅᑎᖦᖢᒋᑦ ᑲᒪᒋᓗᒋᑦ ᓄᓇᓕᖕᒥᑦ ᓂᕈᐊᖅᑎᑦᑎᓃᑦ ᐃᓚᒋᓗᒋᑦ ᓄᓇᕗᒻᒥ ᓂᕈᐊᖅᑎᑦᑎᓂᐅᖃᑦᑕᖅᑐᑦ ᐊᐅᓛᖅᑎᖃᑦᑕᖅᑕᑐᖃᖏᓪᓕ.  ᐱᔾᔪᑎᖓ ᓄᑖᖅ ᒪᓕᒐᐅᑉ ᐊᔾᔨᒌᓕᒃᑲᓐᓂᕆᐊᖁᑉᓗᒋᑦ ᕼᐋᒻᓚᒃᑯᓐᓄᑦ ᐊᒻᒪᓗ ᓄᓇᕗᒻᒥ ᒪᓕᒐᐅᔪᑦ, ᑕᐃᒪᓐᓇᐃᓕᐅᖅᖢᑎᒃ, ᓂᕈᐊᖅᑎᑦᑎᓂᐅᔪᓗᒃᑖᑦ ᐊᔪᕐᓇᙱᓐᓂᖅᓴᐅᓕᖅᑎᖦᖢᒋᑦ ᐊᒻᒪᓗ ᐱᐅᓂᖅᓴᐅᓕᖅᑎᖦᖢᒋᑦ.

ᐊᔾᔨᒌᓂᒃ ᓂᕈᐊᖅᑕᐅᔪᖃᖅᐸᑦ, ᐅᕝᕙᓘᓐᓃᑦ ᐊᔾᔨᒌᙱᓐᓂᖏᑦ ᒪᕐᕉᒃ ᓂᕈᐊᖅᑕᐅᕐᓗᐊᓛᖑᔫᒃ 2% ᑐᖔᓃᑉᐸᑕ ᑲᑎᓗᒃᑖᖅᖢᒋᑦ ᓂᕈᐊᕈᑕᐅᔪᓂᑦ, ᓂᕈᐊᖅᑐᓕᕆᔨ ᓈᓴᐃᒃᑲᓐᓂᕐᓂᐊᖅᑐᖅ.  ᐊᔾᔨᒌᙱᓐᓇᖅᐸᑕ ᓈᓴᖅᑕᐅᒃᑲᓐᓂᖅᑳᖅᑎᓪᓗᒋᑦ ᓂᕈᐊᖅᑐᓕᕆᔨ ᓂᕈᐊᕈᖕᓇᕐᓂᐊᖅᑐᖅ ᓇᓕᑐᐃᓐᓇᖏᓐᓂᒃ ᓂᕈᐊᒐᒃᓴᐅᔫᖕᓂᒃ ᐊᑎᕐᒥᒃ ᐊᒧᓯᓗᓂ ᓂᕈᐊᒐᒃᓵᒃ ᐊᖏᖅᐸᑎᒃ ᐅᕝᕙᓘᓐᓃᑦ ᑐᒃᓯᕋᐅᓯᐅᕐᓗᓂ ᓈᓴᐃᒃᑲᓐᓂᖁᔨᓗᓂ ᐃᖅᑲᖅᑐᐃᔨᕋᓛᒥᒃ.  ᐃᖅᑲᖅᑐᐃᔨᕋᓛᖅ ᓈᓴᐃᒃᑲᓐᓂᖅᐸᑦ ᐊᒻᒪᓗ ᐱᖃᑖ ᓂᕈᐊᒐᒃᓴᖅ ᐊᒥᓲᓂᖅᓴᓂᒃ ᓂᕈᐊᖅᑕᐅᔪᖅ ᓂᕈᐊᖅᑕᐅᓗᓂ.  ᑭᓯᐊᓂ ᐊᔾᔨᒌᙱᓐᓇᖅᐸᑎᒃ ᓂᕈᐊᖅᑕᐅᓂᖏᑦ ᐃᖅᑲᖅᑐᐃᔨᕋᓛᖅ ᐊᑎᕐᒥᒃ ᐊᒧᓯᓗᓂ ᓵᓚᒃᓴᓕᕐᓗᓂ ᐊᒧᔭᖓ.

ᓂᕈᐊᕆᐊᖅᑐᕐᕕᖕᒥᑦ ᓂᐊᖁᙴᒥᑦ, ᓂᕈᐊᕈᖕᓇᕐᓂᐊᖅᑐᑎᑦ ᐃᓕᓐᓂᐊᖅᑐᓕᕆᔨᐊᓛᓄᑦ, ᐊᒻᒪᓗ ᓂᕈᐊᕐᓗᑎᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᒪᐃᔭᒧᑦ ᐃᖃᓗᐃᑦ ᕼᐋᒻᓚᒃᑯᖏᓐᓄᑦ, ᐃᓚᒋᔭᐅᕝᕕᒋᔭᑎᑦ.  ᐊᒻᒪᓗ, ᐊᔪᙱᑎᑕᐅᒍᕕᑦ ᓂᕈᐊᖃᑕᐅᓂᕐᒧᑦ, ᓂᕈᐊᕈᖕᓇᖅᑐᑎᑦ ᐅᐃ-ᐅᐃ ᐃᓕᓐᓂᐊᖅᑐᓕᕆᔨᐊᓛᖏᓐᓄᑦ ᓂᕈᐊᖅᑎᑦᑎᓂᖏᓐᓂᑦ.

ᓂᕈᐊᒐᒃᓴᐅᔪᖅ ᓂᕈᐊᒐᒃᓴᐅᓂᖅ ᐊᔪᖅᑐᖅ ᑕᒪᐃᓐᓄᑦ ᒪᐃᔭᒧᑦ ᐊᒻᒪᓗ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ.  ᓂᕈᐊᕆᐊᖃᖅᑐᖅ ᓇᓕᑐᐃᓐᓇᖏᓐᓄᑦ ᓂᕈᐊᒐᒃᓴᐅᓂᐊᕐᓗᓂ.  ᓂᕈᐊᒐᒃᓴᐅᔪᖅ, ᑭᓯᐊᓂ, ᐃᓕᓐᓂᐊᖅᑐᓕᕆᔨᐊᓛᒃᑯᓐᓄᑦ ᓂᕈᐊᒐᒃᓴᐅᔪᖕᓇᖅᑐᖅ ᓂᕈᐊᒐᒃᓴᐅᒐᓗᐊᕈᓂ ᒪᐃᔭᒧᑦ ᐅᕝᕙᓘᓐᓃᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ.

ᐋᒃᑲ. ᕼᐋᒻᓚᐃᑦ ᓄᓇᙳᐊᓕᐅᖅᑕᐅᓯᒪᔪᑦ ᐊᔾᔨᒋᙱᖦᖢᒋᑦ ᑭᒡᒐᖅᑐᖅᑕᐅᕝᕕᖕᓄᑦ.  ᐊᒃᑐᐊᖃᑎᒌᖕᓂᐊᕋᓗᐊᖅᑎᓪᓗᒋᑦ ᓂᕈᐊᕐᕕᐅᔪᑦ, ᐊᔾᔨᒌᙱᑦᑐᑦ.  25-ᓂᒃ ᓄᓇᓕᒃᑕᖃᖅᑐᖅ ᓄᓇᕗᒻᒥᑦ, ᐊᒻᒪᓗ 22-ᖏᓐᓇᕐᓂᒃ ᑭᒡᒐᖅᑐᖅᑕᐅᕝᕕᒃᑕᖃᖅᖢᓂ.  ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᒍᕕᑦ, ᑕᑯᒋᐊᕐᓗᒍ ᓄᓇᙳᐊᖅ ᕼᐋᒻᓚᐅᔪᓄᑦ.

ᖃᐅᔨᒋᐊᕈᖕᓇᖅᑕᐃᑦ ᓄᓇᓕᖕᓄᑦ ᓄᓇᙳᐊᖅ.  ᓂᕈᐊᖅᑎᒧᑦ ᑎᑭᓯᐅᒪᔾᔪᑎᖏᑦ ᐊᓕᓚᔪᓂᒃ ᐊᐅᓪᓚᖅᑎᑦᑎᔾᔮᖏᑦᑐᑦ ᕼᐋᒻᓚᒃᑯᓐᓄᑦ ᓂᕈᐊᖅᑎᑦᑎᓂᕐᓄᑦ. ᓄᓇᙳᐊᖅ ᓄᓇᓕᖕᓄᑦ ᖃᐅᔨᒋᐊᕐᕕᐅᔪᖕᓇᖅᑐᖅ, ᒪᓂᒪᓂᐊᖅᑐᑦ ᓂᕈᐊᖅᑎᑦᑎᓂᕐᒧᑦ ᐅᑉᓗᕆᔭᐅᔪᑦ ᐊᑐᖅᑎᓪᓗᒋᑦ.

ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔩᑦ ᑲᑎᒪᔨᐊᓛᖑᔪᑦ 7-ᓂᒃ ᑲᑎᒪᔨᖃᖅᖢᑎᒃ ᓄᓇᓕᖕᒥᑐᐃᓐᓇᖅ ᓂᕈᐊᖅᑕᐅᖃᑦᑕᖅᑐᑦ.  ᑲᑎᒪᖃᑦᑕᖅᑐᑦ ᐊᑕᐅᓰᖅᖢᑎᒃ ᑕᖅᑭᒥᑦ ᐱᓕᕆᖃᑎᒋᑉᓗᒋᑦ ᐊᕕᒃᑐᖅᓯᒪᔪᓂᑦ ᐃᓕᓐᓂᐊᕐᕕᖕᓂᑦ ᐊᐅᓛᖅᑎᑦᑎᔨᓂᒃ ᐊᒻᒪᓗ ᐃᓕᓐᓂᐊᕐᕕᖕᒥᑦ ᐱᓕᕆᔨᖏᓐᓂᒃ, ᐃᓱᒪᓕᐅᕆᖃᑦᑕᖅᑐᑦ ᖃᓄᖅ ᐃᓕᓐᓂᐊᖅᑎᑦᑎᓂᖅ ᐱᓕᕆᐊᖑᓂᐊᕐᒪᖔᑦ ᓄᓇᓕᖕᒥᑦ.  ᐱᔭᒃᓴᐅᑎᖏᓐᓂᑦ ᐃᓚᐅᔪᑦ ᐃᓕᓐᓂᐊᕈᑕᐅᓂᐊᖅᑐᓂᒃ ᑕᖅᑭᖅᓯᐅᑎᓕᐅᕐᓗᑎᒃ, ᐃᓕᓐᓂᐊᕆᐊᖃᑦᑕᖅᑐᓄᓪᓗ ᓇᓗᓇᐃᖅᓯᓂᕐᒧᑦ ᐊᑐᐊᒐᒥᒃ.  ᐅᐃ-ᐅᐃ-ᓄᑦ ᐃᓕᓐᓂᐊᖅᑐᓕᕆᔨᐊᓛᑦ ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔨᐅᖕᒥᔪᑦ, ᑭᓯᐊᓂ ᑕᓪᓕᒪᓂᒃ ᑲᑎᒪᔨᖃᖅᖢᑎᒡᓕ 7-ᖑᙱᑦᑐᓂᑦ.  ᐅᖃᓕᒫᒃᑲᓐᓂᕆᑦ ᐱᔾᔪᑎᖃᖅᑐᓂᒃ ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔨᓂᑦ.

ᕼᐋᒻᓚᒃᑯᓐᓄᑦ ᑲᑎᒪᔩᑦ ᐱᔭᒃᓴᐅᑎᖃᖅᑐᑦ ᕼᐋᒻᓚᒃᑯᑦ ᑮᓇᐅᔭᖅᑑᑎᖓᓐᓂᒃ, ᐊᒻᒪᓗ ᐱᔨᑦᑎᕋᐅᑎᖏᓐᓂᒃ ᓲᕐᓗ ᓂᕐᔪᑎᓕᕆᓃᑦ, ᐱᓕᕆᑎᑦᑎᓃᑦ, ᐊᑉᖁᑏᑦ, ᐃᒪᖅ, ᐊᓇᕐᕕᖕᒥᙶᖅᑐᑦ, ᐊᒻᒪᓗ ᕿᑎᒃᑐᓕᕆᓂᖅ.  ᕼᐋᒻᓚᒃᑯᓐᓄᑦ ᑲᑎᒪᔩᑦ 8-ᓂᒃ ᑲᑎᒪᔨᖃᖅᑐᑦ ᐊᒻᒪᓗ ᒪᐃᔭᖃᖅᖢᑎᒃ, ᑕᒪᕐᒥᒃ ᓄᓇᓕᖕᒥᑦ ᓂᕈᐊᖅᑕᐅᖃᑦᑕᖅᖢᑎᒃ.

ᒪᓕᒡᓗᒋᑦ ᓄᑖᑦ ᓂᕈᐊᖅᑎᑦᑎᓂᕐᒧᑦ ᒪᓕᒐᐃᑦ ᐊᑐᓕᕐᓂᐊᖅᑐᖅ ᐅᒃᑑᐱᕆ 1, 2018-ᒥᑦ, ᑕᒪᐅᓇᒥᐊᖅ ᓂᕈᐊᖅᑎᑦᑎᓂᖃᖃᑦᑕᔾᔮᕈᖕᓃᖅᑐᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᐅᕝᕙᓘᓐᓃᑦ ᐃᓕᓐᓂᐊᖅᑐᓕᕆᔨᐊᓛᒃᑯᑦ ᑲᑎᒪᔨᖏᓐᓄᑦ.  ᑭᓯᐊᓂ, ᐃᓐᓄᒃᑕᐅᔭᕆᐊᓖᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᐅᕝᕙᓘᓐᓃᑦ ᐃᓕᓐᓂᐊᖅᑐᓕᕆᔨᐊᓛᒃᑯᓐᓄᑦ ᓂᕈᐊᖅᑕᐅᖃᑦᑕᕐᓂᐊᖅᑐᑦ ᓂᕈᐊᒐᒃᓴᐅᓚᐅᖅᑐᓂᒃ ᓂᕈᐊᖅᑕᐅᖏᖦᖢᑎᒃ, ᐅᕝᕙᓘᓐᓃᑦ ᐊᔪᙱᑦᑐᓂᒃ ᐆᒃᑐᖅᑐᓂᒃ.  ᒪᐃᔭᒧᑦ ᐃᓂᐅᔪᖅ ᐃᓐᓄᒃᑕᐅᓯᒪᔪᖕᓃᖅᐸᑦ, ᐊᓯᐊᓂᒃ ᒪᐃᔭᒥᒃ ᓂᕈᐊᕐᓗᑎᒃ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᒃᑯᑦ ᐅᕝᕙᓘᓐᓃᑦ ᑲᑎᒪᔩᑦ ᑎᒃᑯᐊᖅᓯᓗᑎᒃ.

ᑭᖑᓪᓕᕐᒥᑦ ᕼᐋᒻᓚᒃᑯᓐᓄᑦ ᓂᕈᐊᖅᑎᑦᑎᓂᖅ ᐅᒃᑑᐱᕆ 23, 2023-ᒥᐅᓂᐊᖅᑐᖅ.

ᓂᕈᐊᒐᒃᓴᙳᖅᑐᑦ ᑎᑎᕋᖅᑕᐅᓯᒪᖃᑦᑕᕐᓂᐊᖅᑐᑦ ᑕᒡᕙᓂ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᖕᒥᑦ ᑕᖅᑭᓗᒃᑖᖅ ᓯᕗᓂᐊᒍᑦ ᓂᕈᐊᕐᓇᐅᑉ ᐅᑉᓗᖓᑕ.  ᐱᔭᒃᓴᐅᑎᖃᖅᑐᑦ ᑐᑭᓯᐅᒪᔾᔪᑎᖏᓐᓂᒃ ᓂᕈᐊᒐᒃᓴᐅᓂᖏᑦᑕ ᒥᒃᓵᓄᑦ (ᐊᑐᖅᓯᒪᓂᑯᖏᑦ, ᓯᕗᓪᓕᖅᐸᐅᑎᓂᐊᖅᑕᖏᑦ, ᑕᒪᒃᑯᐊᕋᓗᐃᑦ) ᒪᓂᒪᑎᓪᓗᒋᑦ ᓂᕈᐊᖅᑎᓄᑦ ᓄᓇᓕᖓᓐᓂᑦ.  ᖃᓄᑐᐃᑐᑐᐃᓐᓇᐅᓗᒋᑦ, ᓲᕐᓗ ᐅᖃᓕᒫᒐᕋᓛᑦ, ᐃᓄᖕᓄᑦ ᐅᒡᓚᕋᕐᓗᑎᒃ, ᐅᕝᕙᓘᓐᓃᑦ ᑲᑎᒪᑎᑦᑎᓂᒃᑯᑦ.