ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ ᓂᕈᐊᕐᓂᐅᔪᖅ ᐱᒻᒪᕆᐅᔪᒧᑦ ᐊᐱᖅᑯᑎᒧᑦ ᑐᕌᖓᑉᓗᓂ ᐃᓄᓗᒃᑖᓄᑦ. ᓂᕈᐊᖅᑏᑦ ᑭᐅᖃᑦᑕᖅᑐᑦ ᐊᓯᒧᑦ ᖃᐅᔨᒪᔭᐅᖏᑦᑐᒧᑦ ᓂᕈᐊᕈᑎᒧᑦ, ᓂᕈᐊᖅᑎᑦᑎᓂᖃᕌᖓᑎᑐᑦ.
ᑭᓇ ᐃᓱᒪᓕᐅᕈᖕᓇᖅᐸ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖅᑎᑦᑎᓂᕐᒧᑦ?
ᐅᑯᐊ ᐱᔾᔪᔾᔨᔨᐅᔪᑦ ᐊᒻᒪᓗ ᐃᓄᐃᑦ ᐃᓱᒪᓕᐅᕈᖕᓇᖅᑐᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᕐᓂᕐᒧᑦ:
- ᒪᓕᒐᓕᐅᕐᕕᒃ;
- ᒥᓂᔅᑕᐅᔪᑦ;
- ᒥᓂᔅᑕ; ᐊᒻᒪᓗ,
- ᕼᐋᒻᓚᒃᑯᓐᓄᑦ ᑲᑎᒪᔩᑦ ᐅᕝᕙᓘᓐᓃᑦ ᐊᓯᖏᑦ ᑎᒥᐅᔪᑦ ᐊᖏᖃᑎᒌᒍᑎᒃᑯᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᓐᓄᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᔾᔪᔾᔭᐅᓂᕐᒧᑦ.
ᐊᑐᓂ ᐱᑎᑦᑎᔨᐅᔪᑦ ᐊᒻᒪᓗ ᐃᓄᐃᑦ ᑐᒃᓯᕋᕈᖕᓇᖅᑐᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᓗᑎᒃ ᐱᔾᔪᑕᐅᔪᑐᐃᓐᓇᓄᑦ ᐱᔭᒃᓴᐅᑎᖃᕐᕕᒋᔭᖏᓐᓄᑦ. ᐆᒃᑑᑎᒋᓗᒍ, ᕼᐋᒻᓚᒃᑯᑦ ᑲᑎᒪᔨᖏᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᔪᖕᓇᖅᑐᑦ ᑭᓯᐊᓂ ᕼᐋᒻᓚᒃᑯᓐᓂᑦ ᐱᔾᔪᑎᖃᖅᑐᒧᑐᐃᓐᓇᖅ. ᒥᓂᔅᑕᐅᔪᖅ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᔪᖕᓇᖅᑐᖅ ᑭᓯᐊᓂ ᐱᔾᔪᑕᐅᔪᓄᑐᐃᓐᓇᖅ ᐊᕕᒃᑐᖅᓯᒪᔪᖁᑎᖓᓄᑦ ᐱᔭᒃᓴᐅᑎᖃᕐᕕᒋᔭᖓᓄᑦ.
ᐃᓄᓗᒃᑖᓂᒃ ᐊᑎᓕᐅᖅᑎᑦᑎᓃᑦ
ᐃᓄᓗᒃᑖᑦ ᐊᐱᕆᔪᖕᓇᖅᑐᑦ ᓱᓇᑐᐃᓐᓇᒥᒃ ᐱᔾᔪᑎᓕᖕᒥᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᓗᑎᒃ. ᑕᐃᒪᓐᓇᐃᓐᓂᐊᕐᓗᓂ, ᑐᓂᐅᑎᖃᕆᐊᖃᖅᑐᑦ ᐊᑎᓕᐅᖅᑕᐅᓯᒪᔪᒥᒃ ᐱᑎᑦᑎᔨᐅᔪᒧᑦ ᐱᔭᒃᓴᐅᑎᖃᖅᑐᒧᑦ ᐱᔾᔪᑕᐅᔪᒥᒃ. ᐊᑎᓕᐅᖅᑕᐅᓯᒪᔭᕆᐊᖃᖅᑐᖅ 20%-ᓗᐊᓄᑦ ᓂᕈᐊᖅᑎᓄᑦ ᓂᕈᐊᕐᓂᐊᖅᑐᓂᒃ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒥᑦ.
ᐃᓄᓗᒃᑖᓄᑦ ᐊᑎᓕᐅᖅᑕᐅᔪᖅ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᓂᕐᒧᑦ ᓂᕈᐊᖅᑎᑦᑎᓂᖃᕐᓂᐊᕈᑕᐅᖏᑦᑐᖅ. ᑭᓯᐊᓂ, ᐱᑎᑦᑎᔪᖅ ᐃᓄᒡᓘᓐᓃᑦ ᐱᔭᒃᓴᐅᑎᖃᖅᑐᖅ ᐱᔾᔪᑕᐅᔪᒧᑦ ᐊᑐᕈᖕᓇᖅᑕᖓ ᐊᑎᓕᐅᖅᑕᐅᓯᒪᔪᖅ ᓂᕈᐊᖅᑎᑦᑎᓂᖃᕐᓂᕐᒧᑦ.
ᑭᓇ ᐊᑭᓖᖃᑦᑕᖅᐸ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᓄᑦ?
ᐊᑭᓖᔭᕆᐊᖃᖅᑐᖅ ᐱᑎᑦᑎᔨᐅᔪᖅ ᐅᕝᕙᓘᓐᓃᑦ ᐃᓄᒃ ᐃᓱᒪᓕᐅᖅᑐᖅ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅᑕᖃᕐᓂᐊᕐᓂᖓᓄᑦ. ᐊᑭᓖᔭᕆᐊᖃᖅᑐᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᐊᑐᕐᓂᑯᓗᒃᑖᖏᓐᓄᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒧᑦ.
ᐊᓯᖏᑦ ᒪᓕᒐᐃᑦ ᐊᐱᖅᑯᑎᓄᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᖏᓐᓂᑦ
- ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒧᑦ ᐊᐱᖅᑯᑎ ᑐᑭᓯᓇᑦᑎᐊᕆᐊᖃᖅᑐᖅ, ᑕᑭᓗᐊᖏᓪᓗᓂ, ᐊᒻᒪᓗ ᐃᑲᔪᖅᑐᐃᓂᖃᙱᓪᓗᓂ. ᐱᑎᑦᑎᔪᖅ ᐃᓄᒡᓘᓐᓃᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᔪᖅ ᑎᑎᕋᐃᖃᑦᑕᖅᑐᖅ ᐊᐱᖅᑯᑕᐅᓂᐊᖅᑐᒥᒃ. ᑭᓯᐊᓂ, ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᑦ ᐃᓱᒪᒍᓂ ᐊᐱᖅᑯᑎ ᑐᑭᓯᓇᙱᒻᒪᑦ, ᑕᑭᓗᐊᕐᒪᑦ, ᐊᒻᒪᓗ ᐃᑲᔪᖅᑐᐃᓂᖃᖅᖢᓂ, ᐊᓯᐊᖑᖅᓯᖁᔪᖕᓇᖅᑕᖏᑦ ᐱᑎᑦᑎᔪᑦ ᐃᓄᒡᓘᓐᓃᑦ ᑎᑎᕋᐃᔪᑦ ᐊᐱᖅᑯᑕᐅᓂᐊᖅᑐᒥᒃ.
- ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒥᑦ ᐊᐱᖅᑯᑕᐅᔪᖅ ᐊᐱᕆᔾᔪᑕᐅᑲᓐᓂᕆᐊᖃᙱᑦᑐᖅ ᐅᑭᐅᓄᑦ ᑕᓪᓕᒪᓄᑦ ᑕᐃᒪᙵᑦ ᐊᐱᕆᔾᔪᑕᐅᕌᓂᓚᐅᖅᑎᓪᓗᒍ. ᑕᓪᓕᒪᑦ ᐅᑭᐅᑦ ᐊᓂᒍᖅᑎᓪᓗᒋᑦ ᑭᓯᐊᓂ ᐊᐱᖅᑯᑕᐅᓚᐅᖅᑐᖅ ᐊᐱᖅᑯᑕᐅᑲᓐᓂᕈᖕᓇᖅᑐᖅ ᑖᑉᑯᓄᙵᑦᑕᐃᓐᓇᖅ ᓂᕈᐊᖅᑎᐅᔪᓄᑦ.
- ᐃᓚᖏᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓃᑦ ᐊᑐᓕᖅᑎᑦᑎᓂᖃᖃᑦᑕᖅᑐᑦ. ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ ᐊᑐᓕᖅᑎᑦᑎᓂᖃᕌᖓᑦ, ᓂᕈᐊᕈᑕᐅᔪᓄᑦ ᖃᓄᐃᖓᓂᐅᔪᑦ ᒪᓕᒃᑕᐅᔭᕆᐊᖃᖅᑐᑦ. ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ ᐊᑐᓕᖅᑎᑦᑎᓂᐊᖅᐸᑦ, ᑎᑎᕋᖅᓯᒪᓂᐊᖅᑐᖅ ᑎᓕᓯᔾᔪᑎᒥᑦ (ᐊᑐᖅᑕᐅᖃᑦᑕᖅᑐᖅ ᑐᓴᖅᑎᑦᑎᑉᓗᓂ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒥᑦ). ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ ᒪᓕᒐᕋᓛᕐᒨᖅᐸᑦ ᒪᓕᒃᖢᒋᑦ ᓄᓇᓕᐸᐅᔭᐃᑦ, ᑕᐅᓐ ᐊᒻᒪᓗ ᓄᓇᓕᖃᕐᕕᐅᔪᓄᑦ ᐱᖁᔭᖅ ᐅᕝᕙᓘᓪᓃᑦ ᕼᐋᒻᓚᒃᑯᓐᓄᑦ ᐱᖁᔭᖅ ᐊᑐᓕᖅᑎᑦᑎᓂᖃᐃᓐᓇᖃᑦᑕᖅᑐᖅ.
ᐊᐱᖅᑯᑎᓄᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᖅ (ᓄᓇᕗᑦ)
ᒪᓕᒐᓗᒃᑖᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᓄᑦ ᓄᓇᕗᒻᒥᑦ ᑎᑎᕋᖅᓯᒪᔪᑦ ᐊᐱᖅᑯᑎᓄᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᕐᒥᑦ (ᑭᓯᐊᓂ ᓄᓇᓕᖕᒥᑦ ᐃᒥᐊᓗᐃᑦ ᒥᒃᓵᓄᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᐅᒃᐸᑕ, ᓄᓇᓕᖕᒥᑦ ᓂᕈᐊᖅᑎᑦᑎᔪᖕᓇᖅᑐᑦ ᐱᖁᔭᖅ-ᒦᑦᑐᑦ).
ᐊᐱᖅᑯᑎᓄᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᖅ (ᓄᓇᕗᑦ) ᐊᑐᓕᓚᐅᖅᑐᖅ ᔭᓄᐊᕆ 2014-ᒥᑦ. ᓴᖅᑭᑦᑎᓚᐅᖅᑐᖅ ᓄᑖᓂᒃ ᒪᓕᒐᕐᓂᑦ ᐃᒪᓐᓇᐃᖁᔨᑉᓗᓂ:
- ᐊᐱᖅᑯᑎᓄᑦ ᓂᕈᐊᖅᑎᑦᑎᓃᑦ ᐋᖅᑭᐅᒪᔪᑦ ᑎᑭᐅᑎᑎᑦᑎᓂᕐᒨᖅᑐᑦ ᐊᔾᔨᐅᖏᓐᓂᕆᔭᖓᓄᑦ ᐱᔭᐅᔭᕆᐊᖃᖅᑐᓂᒃ ᓄᓇᕗᒻᒦᖓᔪᓂᒃ ᐃᓄᖏᓐᓂᒃ, ᐱᖅᑯᓯᖓᓄᑦ, ᐊᒻᒪᓗ ᓂᕈᐊᖅᑕᐅᓯᒪᔪᓂᒃ ᖃᐅᔨᓂᐅᔪᓄᑦ;
- ᐊᐱᖅᑯᑎᓄᑦ ᓂᕈᐊᖅᑎᑦᑎᕐᒧᑦ ᐊᐱᖅᑯᑏᑦ ᑐᑭᓯᓇᑦᑎᐊᕐᓗᑎᒃ, ᐊᖏᓗᐊᖏᓪᓗᑎᒃ, ᐊᒻᒪᓗ ᐃᑲᔪᖅᑐᐃᓂᖃᙱᓪᓗᑎᒃ; ᐊᒻᒪᓗ,
- ᒪᓕᒐᐃᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᓄᑦ ᐊᔾᔨᒋᓗᒋᑦ ᓂᕈᐊᖅᑎᑦᑎᓂᐅᔪᓄᑦ ᑎᑎᕋᖅᓯᒪᔪᑦ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᖏᓐᓂᑦ.
ᐅᖃᓕᒫᒃᑲᓐᓂᕆᑦ:
- ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒧᑦ ᒪᓕᒃᑕᐅᔪᒃᓴᖏᑦ (ᓂᕈᐊᖅᑎᓄᑦ,ᐊᑎᓕᐅᖅᑎᐅᔪᓄᑦ, ᐊᒻᒪᓗ ᐊᐅᓚᑦᑎᔨᐅᔪᓄᑦ)
- ᐊᐱᖅᑯᑎᓄᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᖅ
- ᓂᕈᐊᖅᑎᓄᑦ ᒪᓕᒃᑕᐅᔪᒃᓴᖅ ᓄᓇᕗᒻᒥᑦ ᐊᐱᖅᑯᑎᓄᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᕐᒧᑦ
